गुपित

जगा तुम्ही अन अम्हा जगू द्या असाच अमुचा बाणा रे
उगाच वेड्या संघर्षाच्या धनुष्यास ना ताणा रे

जगू आम्ही ते आनंदाने तुम्हीसुद्धा मस्त रहा
नकळत होउनी जाईल सारा संघर्षाचा अस्त पहा

धुऊन टाकू किल्मिष सारे अन्तर्मनही स्वच्छ करू
आणिक सारे आनंदाने पुन्हा एकदा फेर धरू

कविता वाचुनी इतरा वाटे दोन जनातील झगडा हा
सत्य असे ना खचित परी हे गुपित सांगतो तुम्हा पहा

माझ्या मनिच्या दोन तटातील वणव्याची ही आग असे
व्यक्त करुन ते तुम्हा सांगणे आज मला हे भाग असे